2025 жылдың 3 қазанында Ақтөбе қаласында Қазақстан кәсіподақ қозғалысының 120 жылдығы мен ҚР Кәсіподақтар федерациясының 35 жылдығына арналған республикалық «Болашаққа бірге жүгірейік» марафоны өтті. Іс-шара ашық аспан астында жаппай жүгіру түрінде ұйымдастырылып, бірлік пен ынтымақты, салауатты өмір салтын насихаттаған айтулы мереке болды.
Жалпы 505 қатысушы қатарында қала еңбек ұжымдарының өкілдері, студент жастар, еңбек ардагерлері мен медицина қызметкерлері болды. Олардың ішінде Көпсалалы қалалық балалар ауруханасының дәрігері мен екі медбикесі де бар. Олар ынтымақ пен өзара қолдауды, салауатты өмір салтын дәріптеу идеясын қолдап, марафонға белсенді қатысты.
Аурухана ұжымы үшін мұндай ауқымды шараларға қатысу – тек кәсіби міндетін атқарып қана қоймай, өз үлгісімен қоғамды сергек өмірге ынталандырудың айқын көрінісі.