Балалар ауруханасының дәрігерлері интернет-алаяқтардан қалай қорғану керектігін үйренді

Новости (KZ)

Ақтөбе облысы полиция департаментінің киберқылмыстарға қарсы іс-қимыл басқармасының жедел уәкілі, полиция капитаны Жанибек Асылбекұлы Шагиров Көпсалалы қалалық балалар ауруханасының қызметкерлеріне *«Алаяқтарға қалай қарсы тұруға болады»* тақырыбында профилактикалық дәріс өткізді.

Кездесу барысында маман өңір тұрғындары күнделікті кездесіп жүрген интернет-алаяқтықтың ең көп таралған тәсілдері туралы айтты. Олардың ішінде – «банк қызметкерлері» атынан жасалатын жалған қоңыраулар, фишингтік сайттар, зиянды сілтемелері бар хабарламалар, сондай-ақ әлеуметтік желілер мен мессенджерлер арқылы жасалатын алдау түрлері бар.

Қаржылық қауіпсіздік мәселесіне ерекше назар аударылды: жеке мәліметтер мен банк картасының деректерін бөгде адамдарға бермеу, сайттар мен хабарламалардың шынайылығын тексеру, сондай-ақ алаяқтық әрекеттерге тап болған жағдайда қайда жүгіну қажеттігі түсіндірілді.

Аурухана қызметкерлеріне киберқауіпсіздіктің негізгі ережелері көрсетілген практикалық кеңестер мен жадынама ұсынылды. Мұндай кездесулер медицина қызметкерлерінің цифрлық сауаттылығын арттыруға, сонымен қатар қызметкерлер мен олардың пациенттерін интернет-қылмыскерлердің әрекеттерінен қорғауға ықпал етеді.

Аурухана әкімшілігі полиция департаментіне ынтымақтастығы мен пайдалы профилактикалық жұмысы үшін алғыс білдірді.